laeknastodine15ccbf9

Hryggjaraðgerðir ekki lengur með greiðsluþátttöku út árið, þrátt fyrir brýna þörf!

Wed, 13 May 2026 20:06:35 GMT

Frá og með 26. maí eru hryggjaraðgerðir ekki lengur með greiðsluþáttöku Sjúkratrygginga, þrátt fyrir að yfir 100 manns séu á biðlista hjá okkur. Margir sjúklingar eru í brýnni þörf fyrir aðgerð innan skamms tíma svo ekki hljótist varanlegur skaði af.

Í lok janúar, þegar ljóst var að úthlutun fjármagns var langt undir áætlun og ekki í samræmi við samning, reyndum við allar leiðir sem okkur voru færar til þess að fá samþykki fyrir fleiri aðgerðum. Þrátt fyrir að við höfum barist fyrir hönd sjúklinga, með fjölmörgum samtölum, skrifum og fundum (með Sjúkratryggingum og Heilbrigðisráðherra), hefur ekkert verið gert til að bæta ástandið að hálfu yfirvalda.

Við getum ekki réttlætt að bregðast ekki við ástandinu fyrir hönd sjúklinga og vera með fullmannaðar, en tómar skurðstofur. Við ætlum því að bjóða áfram upp á þessar aðgerðir, með hag sjúklinga að leiðarljósi. Við munum ennþá taka á móti sjúklingum og eru viðtölin innan greiðsluþátttökukerfis, en sjúklingum stendur til boða að greiða sjálfir fyrir aðgerð skv. verðskrá.

Landspítalinn getur ekki tekið við svo miklu magni sjúklinga og við erum eina læknastöðin sem getur gert hryggjaraðgerðir með sömu gæðakröfum vegna aðgerðatækni. Heila- og taugaskurðlæknar framkvæma hryggjaraðgerðir hjá okkur með aðgerðarsmásjá, en þá getur sjúklingur farið heim samdægurs, er minna verkjaður og minni hætta er á sýkingu.

Opnunartími yfir páskana

Wed, 01 Apr 2026 14:55:25 GMT

Læknastöðin verður lokuð yfir páskana, frá skírdegi og út annan í páskum.

Á meðan á lokun stendur verður einnig lokað fyrir skilaboð í gegnum „Mínar síður“.

Við óskum ykkur gleðilegra páska og hlökkum til að taka á móti ykkur að nýju að páskafríi loknu.

300. bakaðgerðin framkvæmd í Orkuhúsinu

Fri, 13 Mar 2026 10:09:15 GMT

Í dag var framkvæmd 300. aðgerðin á hrygg í Orkuhúsinu. Um er að ræða aðgerðir vegna brjóskloss eða þrenginga í mænugöngum í mjóbaki.

Læknastöðin Orkuhúsið hefur gert samning við Sjúkratryggingar Íslands um þessar aðgerðir. Það þýðir að sjúklingar greiða einungis samkvæmt stöðu sinni hjá Sjúkratryggingum Íslands, líkt og fyrir aðrar aðgerðir og viðtöl hjá sérgreinalæknum.

Þessi áfangi markar mikilvægt skref í þróun þjónustunnar og undirstrikar þá sérfræðiþekkingu sem byggst hefur upp í Orkuhúsinu á sviði bakaðgerða.

Myndband: Aðgerðir vegna brjóskloss og mænugangaþrengsla

Fri, 06 Mar 2026 09:48:00 GMT

Í Orkuhúsinu eru framkvæmdar aðgerðir vegna brjóskloss og mænugangaþrengsla í mjóbaki þegar önnur meðferð hefur ekki borið árangur.

Í aðgerðunum er notuð smásjá sem gerir skurðlæknum kleift að vinna með meiri nákvæmni og minni inngrip í heilbrigðan vef. Þetta getur dregið úr blæðingum, bólgum og verkjum eftir aðgerð og minnkað líkur á fylgikvillum.

Í myndbandinu hér fyrir neðan er farið yfir hvernig slíkar aðgerðir fara fram og við hverju sjúklingar geta búist í ferlinu.

Orkuhúsið tekur þátt í úttekt og vinnustofu um starfræna þróun

Tue, 23 Sep 2025 13:45:45 GMT

Læknastöðin Orkuhúsinu, sem er sjálfstætt starfandi heilbrigðisfyrirtæki, tekur þátt í úttekt á stafrænum sjúkraskrárkerfum og notkun þeirra, ásamt þremur ríkisstofnunum. Við teljum mikilvægt að taka þátt í öllum verkefnum með ríkinu sem geta stuðlað að bættri heilbrigðisþjónustu og bættri reynslu sjúklinga.

Markmið þessarar úttektar er að niðurstaðan veiti góða mynd af því hvar við stöndum í stafrænni umbreytingu og hvað þarf að gera til að bæta notkun og samvirkni kerfanna þvert á þjónustuveitendur. Þetta á að stuðla að betri upplifun sjúklinga og tryggja að þeir fái heildstæðari yfirsýn yfir sína heilbrigðisþjónustu.

Frétt heilbrigðisráðuneytisins til frekari upplýsinga:

Stjórnarráðið | Mikilvægt skref í stafrænni þróun á landsvísu.

Sameina krafta fyrir betri þjónustu

Tue, 23 Sep 2025 13:35:01 GMT

Í dag var formlega undirritaður samningur milli Sjúkratrygginga Íslands annars vegar og Læknastöðvarinnar Orkuhúsinu og Læknahússins Dea Medica hins vegar.

Það er nýmæli að tvö sjálfstætt starfandi heilbrigðisfyrirtæki taki höndum saman og geri sameiginlegan samning við Sjúkratryggingar. Fyrirtækin styrkja hvort annað í gæðamálum og þjónustu við sjúklinga.

Hjá Orkuhúsinu verða framkvæmdar hryggja- og liðskiptaaðgerðir, en hjá Dea Medica verða gerðar brjóstaminnkunaraðgerðir.

Við fögnum því að þessi langtímasamningur sé kominn á, þar sem hann tryggir samfellu í þjónustu við sjúklinga og varanlega greiðsluþátttöku til framtíðar.

Sumarlokun

Mon, 22 Sep 2025 13:43:41 GMT

Læknastöðin Orkuhúsinu verður með lokanir vegna sumarleyfa. Skurðstofan lokar frá og með 8. júlí og opnar eftir verslunarmannahelgi 5. ágúst.

Móttakan lokar aðeins síðar, eða 10. júlí og opnar á sama tíma eftir verslunarmannahelgi.

Við vonum að allir hafi það gott í sumar!